ବଲିଉଡର କ୍ୱିନ୍ ଭାବେ ଜଣାଶୁଣା ଲୋକପ୍ରିୟ ଅଭିନେତ୍ରୀ କଙ୍ଗନା ରଣାୱତ । ଚଳିତ ଲୋକସଭା ନିର୍ବାଚନରେ ସେ ପ୍ରଥମ ଥର ପାଇଁ ହିମାଚଳ ପ୍ରଦେଶର ମଣ୍ଡି ଲୋକସଭା ଆସନରୁ ବିଜେପି ଟିକେଟରେ ନିର୍ବାଚନ ଲଢ଼ିଥିଲେ । ଅଭିନୟରୁ ରାଜନୀତି ଦୁନିଆରେ ପ୍ରଥମ ଥର ପାଇଁ ଏଣ୍ଟ୍ରି କରିଥିବା କଙ୍ଗନା ରଣାୱତ ମଣ୍ଡି ଲୋକସଭା ଆସନରୁ ବିଜେପି ଟିକେଟରୁ ବିଜୟ ହାସଲ କରି ଲୋକଙ୍କ ହୃଦୟ ଜିତିପାରିଛନ୍ତି ।କଙ୍ଗନା ତାଙ୍କ ନିକଟତମ ପ୍ରତିଦ୍ୱନ୍ଦି ବିକ୍ରମାଦିତ୍ୟ ସିଂଙ୍କୁ ପ୍ରାୟ ୭୦ ହଜାରରୁ ଉର୍ଦ୍ଧ୍ୱ ଭୋଟ୍ ବ୍ୟବଧାନରେ ପରାସ୍ତ କରିଛନ୍ତି । ବର୍ତ୍ତମାନ ସେ ବଲିଉଡ ନୁହେଁ ବରଂ ରାଜନୀତିର କୁଇନ୍ ଭାବେ ସେ ଚର୍ଚ୍ଚାରେ ଅଛନ୍ତି । କଙ୍ଗନା କଂଗ୍ରେସର ପୂର୍ବତନ ମୁଖ୍ୟମନ୍ତ୍ରୀ ତଥା ବର୍ତ୍ତମାନର ସାଂସଦ ବୀରଭଦ୍ର ସିଂହଙ୍କ ସୁପୁତ୍ର ବିକ୍ରମାଦିତ୍ୟ ସିଂହଙ୍କୁ ୭୦ ହଜାରରୁ ଉର୍ଦ୍ଧ୍ୱ ଭୋଟରେ ପରାସ୍ତ କରିଛନ୍ତି । ଏହି ବିଜୟକୁ ନେଇ କଙ୍ଗନା ‘ଏକ୍ସ’ରେ ଏକ ପୋଷ୍ଟ ଶେୟାର କରି ଲେଖିଛନ୍ତି, ‘ସମସ୍ତ ମଣ୍ଡିବାସୀଙ୍କ ଭଲପାଇବା ଏବଂ ବିଶ୍ୱାସ ପାଇଁ ମୁଁ ହୃଦୟରୁ କୃତଜ୍ଞ । ଏହି ବିଜୟ ସମସ୍ତଙ୍କର, ଏହି ବିଜୟ ପ୍ରଧାନମନ୍ତ୍ରୀ ମୋଦୀ ଜୀଙ୍କର ଏବଂ ବିଜେପିର ବିଶ୍ୱାସର, ସନାତନର, ମଣ୍ଡିର ସମ୍ମାନର ।’
