ପିଏମ ଇଣ୍ଟର୍ନସିପ ସ୍କିମ :ଅକ୍ଟୋବର ୧୨ରୁ ୱେବସାଇଟରେ କରିପାରିବେ ପଞ୍ଜୀକରଣ

ଯୁବକମାନଙ୍କୁ ନିଯୁକ୍ତି ଦେବା ଲକ୍ଷ୍ୟରେ କେନ୍ଦ୍ର ସରକାର ପାଇଲଟ ପ୍ରୋଜେକ୍ଟ ପିଏମ ଇଣ୍ଟର୍ନସିପ ସ୍କିମ ଆରମ୍ଭ କରିଛନ୍ତି। ଏଥିପାଇଁ ଅକ୍ଟୋବର ୧୨ରୁ ଅନଲାଇନ ଆବେଦନ ଆରମ୍ଭ ହେବାକୁ ଯାଉଛି। ଇଣ୍ଟର୍ନସିପ ବର୍ଷେ ହେବ ଏବଂ ଏଥିରେ ମନୋନୀତ ଯୁବକମାନଙ୍କୁ ପ୍ରତି ମାସରେ ୫ହଜାର ଟଙ୍କା ଆର୍ଥିକ ସହାୟତା ଦିଆଯିବ । ଏହା ବ୍ୟତୀତ ନିଜେ ଇଣ୍ଟର୍ନସିପ ଆରମ୍ଭ କଲେ ୬ହଜାର ଟଙ୍କା ପ୍ରଦାନ କରାଯିବ। ଅର୍ଥମନ୍ତ୍ରୀ ନିର୍ମଳା ସୀତାରମଣ ତାଙ୍କ ବଜେଟ ଭାଷଣ ସମୟରେ ଏହି ଯୋଜନା ବିଷୟରେ ସୂଚନା ଦେଇଛନ୍ତି। ପିଏମ ଇଣ୍ଟର୍ନସିପ ସ୍କିମ ଅଧୀନରେ ଯୁବକମାନେ ଭାରତର ଶ୍ରେଷ୍ଠ ୫୦୦ କମ୍ପାନୀରେ ଇଣ୍ଟର୍ନସିପ କରିବାର ସୁଯୋଗ ପାଇବେ। ଏହି ଯୋଜନାର ଉଦ୍ଦେଶ୍ୟ ହେଉଛି ଆସନ୍ତା ୫ ବର୍ଷରେ ଦେଶର ୧କୋଟି ଯୁବକଙ୍କ ଦକ୍ଷତା ବିକାଶ କରିବା। ପିଏମ ଇଣ୍ଟର୍ନସିପ ପାଇଁ ମନୋନୀତ ପ୍ରାର୍ଥୀଙ୍କୁ ୬ ହଜାର ଟଙ୍କା ଏବଂ ମାସକୁ ୫ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରାଯିବ। ସୂଚନା ଅନୁଯାୟୀ, ଚଳିତ ଆର୍ଥିକ ବର୍ଷରେ ୧.୨୫ ଲକ୍ଷ ଯୁବକଙ୍କୁ ଇଣ୍ଟର୍ନସିପ ସୁଯୋଗ ପ୍ରଦାନ କରିବାର ଯୋଜନା ରହିଛି। PM ଇଣ୍ଟର୍ନସିପ ପାଇଁ ଆଗ୍ରହୀ ପ୍ରାର୍ଥୀମାନେ ଅକ୍ଟୋବର ୧୨ ମଧ୍ୟରାତ୍ରିରୁ www.pminternship.mca.gov.in ୱେବସାଇଟ ରେ ପଞ୍ଜୀକରଣ କରିପାରିବେ। ସଂକ୍ଷିପ୍ତ ତାଲିକାଭୁକ୍ତ ପ୍ରାର୍ଥୀଙ୍କ ତାଲିକା ଅକ୍ଟୋବର ୨୬ ସୁଦ୍ଧା କମ୍ପାନୀମାନଙ୍କୁ ଦିଆଯିବ। ବିଜୟଦଶମୀ ଦିନ ଏହି ପୋର୍ଟାଲରେ ପଞ୍ଜୀକରଣ ଆରମ୍ଭ ହେବ। ବର୍ତ୍ତମାନ ପର୍ଯ୍ୟନ୍ତ ଏହି ଯୋଜନାରେ ୧୧୧ କମ୍ପାନୀ ଅଂଶଗ୍ରହଣ କରିଛନ୍ତି, ଏହା ବ୍ୟତୀତ ମହାରାଷ୍ଟ୍ର, ଉତ୍ତରପ୍ରଦେଶ, ତେଲେଙ୍ଗାନା ଏବଂ ଗୁଜରାଟ ରାଜ୍ୟଗୁଡିକ ମଧ୍ୟ ରହିଛନ୍ତି। ସରକାରଙ୍କଠାରୁ ସଂକ୍ଷିପ୍ତ ତାଲିକାଭୁକ୍ତ ପ୍ରାର୍ଥୀଙ୍କ ତାଲିକା ପାଇବା ପରେ କମ୍ପାନୀଗୁଡିକ ଅକ୍ଟୋବର ୨୭ରୁ ଚୂଡ଼ାନ୍ତ ଚୟନ କରିବେ। ଏହା ପରେ, ଡିସେମ୍ବର ୨ରୁ ଇଣ୍ଟର୍ନସିପ ଆରମ୍ଭ ହେବ। PM ଇଣ୍ଟର୍ନସିପ ସ୍କିମର ଲାଭ ପାଇବା ପାଇଁ ପ୍ରାର୍ଥୀଙ୍କ ବୟସ ସୀମା ୨୧ରୁ ୨୪ବର୍ଷ ପର୍ଯ୍ୟନ୍ତ ସ୍ଥିର କରାଯାଇଛି। ଏହା ବ୍ୟତୀତ ପରିବାରର ବାର୍ଷିକ ଆୟ ୮ ଲକ୍ଷରୁ ଅଧିକ ହେଲେ ଆବେଦନ ପାଇଁ ଯୋଗ୍ୟ ବିବେଚିତ ହେବେ ନାହିଁ।